URTEAN ZEHARREKO 21. DOMEKEA - C -

 

SARRERAKO OHARKIZUNA

   Gure salbamena Jainkoaren gauzea da; baina Jesusek salbamen horren ezaugarriak emoten deuskuz: alkartasuna, alkarrentzako harrera ona eta abar. Gaur bakotxak berean egon ta izan nahi dogu, elizan eta otoitzean ere bai; besteak iguingarri-edo doguz. Ez da hori Jesusek iragarten deuskun salbamenaren ezaugarri... Alkartu gaitezan Eukaristia honen mahai inguruan eta otoitzean.

Sarrera-abestia: "Zein gozo ta eder dan..."

 

DAMU-OTOITZA

   Jainkoaren doai edo erregalu lez barik, geure lorpen lez ulertzen dogu salbamena, eta betebehar zaleak gara, lege zaleak, itxura zaleak. Damutu gaitezan Eukaristia honen hasieran:

   —Jesus Jauna: gure azaleko arazoak saihesten dozuzana, erruki, Jauna!
   —Jesus Jauna: alkartasunean ta justizian nahi gaituzuna, Kristo, erruki!
   —Jesus Jauna: Jainkoaren salbamena gizaki guztientzako iragarten dozuna, erruki, Jauna!

 

Lehenengoa: Is 66, 18-21

   Jainkoaren epaiak herrialde guztiak alkartzea dakar bere aurretik. Horren esangurea, salbamena herrialde guztietara zabaldua dala da. Entzun daigun Profetearen barri pozgarri hau.

 

Erantzun-Salmoa:  (116) "..."

            R/ GORATU EIZU JAUNA ORAIN TA BETI

 

Bigarrena: Hb 12, 5-7.11-13

   Tentaldietan ta arriskuetan eutsi beharra sakontzen dau gaurko irakurgai honek ere; gure eredua Kristo Jesus dogu, danean zintzoa izan zan arren, zigorkatua ta Jainkoak baztertua lez hila.

 

Ebanjelioa: Lk 13, 22-30

   Zelango galderak egin geikeoz Jesusi? Zelan erantzungo deusku? Jesusen erantzunek hausnarketa sakona eskatzen dabe, eta otoitz giroa. Egin deiogun harrerea Aleluia abestuz, zutunik.

   "Aleluia".

 

JAINKO HERRIAREN OTOITZA

†  Zuzendu deioguzan gure eskariak Jainkoari, bere salbamena gugana ta gizaki guztiengana heltzeko gogo ta eskariagaz:

   —Elizea inguru ireki bat izan daiten gizaki, herrialde, arraza, kultura eta izakera guztientzako, eskatu deiogun Jaunari.

   —Herri-agintari ta nagusiek bestenganako begiramena indartu ta gauzatu daien, alkarrenganako eroapena eta herrien arteko alkarrizketea, eskatu deiogun Jaunari.

   —Domekako Eukaristiaren mahai inguruan alkartzen garenok, eta Kristogaz bat egin, Justiziaren aldeko konpromisua geure bizitzara eroan daigun, eskatu deiogun Jaunari.

†  Entzun, Jauna, zure gurariagazko zintzotasunean bizi izan gura dogunon eskariak, eta egizu, gizaki guztiek izan daiela zure salbamenaren atsegina. Jesukristo gure Jaunaren bitartez.

   —Amen.

 

OHARRAK

 

 

URTEAN ZEHARREKO XXVI. IGANDEA —C—

Sarrera-oharra

   Senideok: Gure uste ona (edo konfiantzea) Jainkoagan dogu, ala berari egiten deutsoguzan gauzetan? Ze balio emoten deutsegu gure otoitzari, mezeari, limosnei, eliz-ekintzei, mesedeak egiteari, eta abar?

   Gaurko munduan, batzuk dirua amesten dabe, beste batzuk ahalmena edo indarra, eta makalenek amuletoak erabilten dabez, honeek gatxetik babestuko dabezelakoan...

   Jainkoa ez daitela izan guretzat amuletu bat, behartsuenganako etenbako deia baino: Aita dogu, eta seme-alaba nahi gaitu. Ospatu daigun seme-alabatasuna nabaritu ta indartuko dauen Jesukristoren esker otoitza, euren lurraldetik urten beharra izan dabenak-eta gogoan izanik.
 

Sarrera-abestia: Aita baten semeok...
 

Damu-otoitza

   Eratuta dagoen gizartean bizi gara, eta, sarriegitan, inoren esku itxi do­guzan arduretaz gogoratu ere ez gara egiten. Damutu gaitezan gure nagikeriaz:

   —Jesus Jauna, jaio barritan erbesteratua izan zinana, erruki, Jauna!
   —Jesus Jauna, baztertuen lagun egin zinana, Kristo, erruki!
   —Jesus Jauna, zure mahaira danetarikoak deitzen dozuzana, erruki, Jauna!
 

1. Irakurgaia

   Siniskerian, erlijio-ekintzak norberaren babesle lez hartzen dira. Sinismenean Jainkoa lagun lez hartzen da, eta beragaz egotea bilatzen da. Jokabide honeaz, Jainkoak behartsuengana bultzatzen dau.
 

Erantzun salmoa:   R/. Goratu daigun Jauna, orain ta beti.
 

2. Irakurgaia

   Sinismenean egia bilatzen da, eta egiaren barri emotea. Ez da, ba, Jainkoaren ezaupidea haregazko hartu-emonak ezkutuan bizi izatea, autorle izatea baino.
 

Ebanjelioa

   Dirutan edo indarkerian-eta uste dabenek, txikiak-eta baztertu egiten dabez. Eta Jainkoa txikien ta baztertuen artean dago, eurekin bat eginda. Egin deiogun harrerea hori dinoskun Jesusi, aleluia abestuz, zutunik.

Eskariak

   † Jainkoak bizitzako gora-behera ta arazoetan aurkitu daigula nahi dau; gaurko gure otoitza herrialdea bertan behera itzita leku-bila han-hor-hemen dabizenekin bat egindakoa izan daitela:

   —Gure Elizbarrutiaren alde: «arrotz nintzan eta etxean hartu ninduzun» gauzatu nahi dau. Izan daiala eliztar guztion oneritxia, eskatu deiogun Jaunari.

   —Hara-hona dabizenen alde: errazkeriaren sareetan jausi ez daitezan, eta besteontzat senidetasunerako dei gertatu daitezan, eskatu deiogun Jaunari.

   —Aberaskerietan, ondasunak alperrik galtzen diharduenek entzun ahal izan daien behartsuen oihua, eta eurekin alkarbanantzeko gauza izan  daitezan, eskatu deiogun Jaunari.

   —Gure etxe ta sendiak maitasun-eskola eta harrera-leku izan daitezan, eta, horretarako, sendi-otoitza izan daiten euretan, eta Jainkoaren izena goratua izan daiten, eskatu deiogun Jaunari.

   —Eukaristiara hurreratu garenok ondasunen banantzaile izan gaitezan, eta gure uste ona Jainkoagan izan daigun eta ez geure erlijio-ekin­tzetan, eskatu deiogun Jaunari.

   † Jainko Aita, emoiguzu zintzotasun Espiritua zure bihotzaren ondasunen barri-emoile ta banantzaile izan gaitezan. Jesukristo gure Jaunaren bitartez.

   —Amen.

 

Oharrak

 

 

URTEAN ZEHARREKO XXV. IGANDEA —C—

Sarrera-oharra

     Senideok: ba ete dabe zer ikusirik gure ondasunek Jainkoaren nahiarekin? Esan behar ete deusku Jainkoak zelan erabili behar doguzan gure ondasunak? Batzuk horrela uste izango dabe, eta ondo bereiztuko (edo dis­tin­giduko) dabez ondasunak eta Jainkoaren nahia. Baina ondasun guztien iturri bakar Jainkoa dala autortzen dakianak beste hauxe egingo dau: ondasunak ondo erabili ahal izateko, ea zer dinon Jainkoak begiratu, bilatu... Izan gaitezan horreetarikoak.

Sarrera-abestia

—Zein gozo ta eder dan  

Damu-otoitza

     Ba dakigu Jainkoari osasuna eskatzen, eta gure hildakoen ta maiteen alde ere eskatzen dogu. Baina eskatzen ete dogu ondasunen banantzaile zintzo izaterik? Bihotz barritzeko asmotan jo daigun Jainkoaren errukira.

     —Jesus Jauna, Jainkoaren ondasunen barri emoten deuskuzuna, erruki, Jauna!

     —Jesus Jauna, behartsuengana hurreratzen zinana, Kristo, erruki!

     —Jesus Jauna, gure ondasun bakar izan nahi dozuna, Erruki, Jauna!

Lehenengo irakurgaia

     Ondasunak pilatzearren besteak —batez ere makalenak— zapaltzera heltzen gara. Horren salakuntzea egingo dau profeteak, eta Jainkoak zer nahi dauen iragarriko deusku.

Erantzun salmoa: R/ Erruki hutsa dogu Jauna, errukia ta maitasuna.

Bigarren irakurgaia

      Herri agintarien alde eskatzen irakatsiko deutse Paulok bere ikasleei, eta Jainkoak bere Semeagan iragarten deuskun bidea bilatzen... bakez bizi izan gaitezan.

Ebanjelioa

     Zein arduragabeak garen Jainkoari dagokiozenetan! Zenbat arduratzen garen, ordea, bestelakoetan! Baina Jainkoaren nahia bilatuko bagendu, beste gauzek eta ondasunek aparteko balioa hartuko leukee Jesusengan. Egin deiogun harrerea, Aleluia abestuz, zutunik.

Eskariak

     Ondasun guztien iturburu den Jainkoari zuzendu deioguzan gure eskariak:

     —Gure eliz alkarteen alde: behartsu ta baztertuengana hurreratzen jakin daian, eta hareik bere mahaira erakarten, eskatu deiogun Jaunari.

     —Baztertuen, lanik bakoen eta sufritzen dabenen alde lanean diharduenek beti izan daien guztien Aita dan Jainkoaren laguntza-ziurtasuna, eskatu deiogun Jaunari.

     —Ondasunen jabe izanik, edozelan eralgiten dabezenen alde: ondasunekin Jainkoa gorestea bilatu daien, eta ez euren atsegin hutserako erabiltea, eskatu deiogun Jaunari.

     —Beharrizanik barik, ondasunen jabe garenok neurritsu izaten ikasi daigun, eta ondasunak alkarbanantzen, eskatu deiogun Jaunari.

     —Ondasunen banatzaile eta behartsuen ondoko dan «Karitas»en alde: geure-geure gauza lez hartu daigun eta bere lana aintzat hartu, eskatu deiogun Jaunari.

 

     Jainko Aita, ondasun guztien iturburu, ondasunen jabe egin gaituzunok esker onez jo dogu zure errukira. Entzun, arren, gure otoitza. Jesukristo.

     -Amen.

Jaunartzerako

     Guztiz ahaltsua ta oparo aberatsa behartsu egiten da gugaitik maite gaitulako, eta bere mahaira deiegiten deusku, geu ere, besteen alde, behartsu bihurtzeko. Alkartu gaitezan beragaz ogi honetan.

Azkenean

     Gogorrak izan dira profetearen berbak ondasun-gose direnen aurka eta behartsu-zapaltzaileen aurka. Izango ete gara neurritsu eta behartsuak gure mahaikide egitekoak?

 

 

Azken oharrak

 

URTEAN ZEHARREKO 24. DOMEKEA - C -

SARRERAKO OHARKIZUNA

   Senideok: Urduritasunean bizi gara aspalditik, herrialde aberatsetakook, eta ahaltsuen propagandeak eragina dau gugan. Baina aldiei sinismen ikuspegitik begiratu nahi badeutsegu, eta Jainkoaren seme-alaba izaten ikasi, propaganda-iturria ebanjelioan bilatu behar izango geuke, sinisten dogun Jainkoa ezagutu, eta haren seme-alaba lez bizi izaten ahalegindu. Bide horretan beste urrats edo pausu bat izan daitela gaurko Eukaristia hau.
 

Sarrera-abestia: "Aita baten semeok..." 

 

DAMU-OTOITZA

† Senideok, ez deusku atsegin betea ta zoriona legezko izateak emoten, edo aberastasun handien jabe izateak, Jainkoaren bihotz errukitsua ezagutzeak baino. Hurreratu gakiozan, apaltasunez:
 

   —Jesus Jauna, Jainkoaren aita-amatasunaren barri emoten deuskuzuna, erruki, Jauna!

   —Jesus Jauna, Jainkoaren benetako parkamen gozora garoazuzana, Kristo, erruki!

   —Jesus Jauna, ahaltsu izatea errukior bihotzaz erakusten dala dinoskuzuna, erruki, Jauna!

 

Lehenengoa: Ex 32, 7-11.13-14

   Gizakiaren aspaldiko ustea da bere bideetan bilatzea askatasuna ta zoriona. Eta argi euki behar dogu, jaio barria ama barik ezer ez dan lez, geu ere Jainkoagandik urrun ez garala ezer.

 

Erantzun-Salmoa:  (50) "..."
 

R/. Erruki hutsa dogu Jauna, errukia ta maitasuna

 

Bigarrena: 1Tim 1, 12-17

   Sinismenagaz topo egiteak barru-barrutik aldatu daike gizakia, eta beragan sortu dan barrikuntzearen barri-emoile bihurtzen dau. Zelango sinismena ete da gurea, barritu ez bagara, edo haren barri emoten ez badakigu? Hausnartu daigun irakurgai hau entzutean.

 

Ebanjelioa: Lk 15, 1-32

   Lukas ebanjelariak Jesusengandik ikasitako Jainkoaren bihotzaren barri emongo deusku: maitalea, errukitsua... Egin deiogun harrerea, Aleluia abestuz, zutunik

"Aleluia".

JAINKO HERRIAREN OTOITZA

†  Zuzendu deioguzan gure eskariak bere seme-alabenganako errukiz ta maitasunez beteriko Aita lez Jesusek erakusten deuskun Jainkoari, hauxe esanez: Jauna, erakutsi eiguzu Aitaren bihotza:
 

   —Seme txikiaren antzera, Jainkoa euren amesen eta atsegin-bideen oztopo lez ikusten dabenen alde: Jainkoa dala gizakiaren atseginen ta zorionaren betetzaile bakar aurkitu daien, egin daigun otoitz.

   —Bidegabekerietan ibiliz euren bizitzea itxuragabetzen dabenen alde: euren bihotz barruan aurkitu daien, kanpoan bilatzen daben zorion-iturria, egin daigun otoitz.

   —Seme nagusiaren antzera, eginbeharraren eta arduren ta betekizunen morroi direnen alde, betebeharrok, behar bada, maitasun barik betetuz: behartsuengan aurkitu daiezan Jainko seme-alabak, euren senideak, egin daigun otoitz.

   —Harrera on egiten ikasi daigun, parkatzen eta laguntzen, beharrizanean dagoena gutxietsi barik eta bere duintasunean hartuz, eta bere askatasuna errespetatuz, egin daigun otoitz.

   —Jainkoaren erruki-maitasunen barri izateak, Jainkoa gugaz dan lango onak geu ere besteekaz onak izatera eroan gaizan, egin daigun otoitz.

   —Gure inguruan ikusten doguzan txarkeria guztien gainetik ikusi ahal izan daigun Jainkoaren indarra lanean, guretzat ona baino besterik nahi ez dauana, egin daigun otoitz.
 

†  Egizu, Jauna, zure maitasunaren eta errukiaren bizikizun gozoa izan daigula. Jesukristo gure Jaunaren bitartez.

   —Amen.

 

OHARRAK

 

URTEAN ZEHARREKO 23. DOMEKEA - C -

SARRERAKO OHARKIZUNA

   Senideok: gure bizitzan zer da lehenengo: "neure" gogoa, atsegina ta helburuak, ala Jainkoak nitaz gura dauana? Hauxe azkeneko hauxe da beharrezkoa Kristoren jarraitzaile izateko. Aurreko jarrereak, Jainkoaren aurrean beti negarti agertzera eroango gaitu.

   Kristoren jarraitzaile izateko beste urrats bat emon daigula Eukaristia honetan, Espirituaren taupadetan.

Sarrera-abestia: "Bihotz batez alkarturik..."
 

DAMU-OTOITZA

† Bere jarraitzaile izango diranen bila dabilen Jesusen aurrean, autortu daigun gure epelkeria, erosokeria, guzur-bizitza:

   —Jesus Jauna, edozeren gainetik Aitaren nahia bilatzen dozuna, erruki, Jauna!

   —Jesus Jauna, helbururik ederrena erreinuaren iragarpena dala dinoskuzuna, Kristo, erruki!

   —Jesus Jauna, zuri jarraitzeko, baldintza zehatz-gogorrak jarten deuskuzuzana, erruki, Jauna!
 

Lehenengoa: Jk 9, 13-19

   Gure ez-jakinak ez gaitu eroan behar errezkeria bideetan zehar, Jainkoari bere jakituria eskatzera baino. Hau egiten dogunean, salbamenaren aurtorle gara gure inguruetan.

Erantzun-Salmoa:  (89) "..."

R/. Gora Jainkoa, egin kantu: bihotz hautsiak bizten ditu
 

Bigarrena: Hb 12, 18-19.22-24a

   Gero eta gatxago egiten jaku inori mesede eskatzea, norbere burua gutxiestea litzatekelakoa daukagu. Baina kristinauen artean, eguneroko gauza lez hartu behar izango litzateke...
 

Ebanjelioa: Lk 14, 1.7-14

   Jesusi jarraitzea ez da gauza erreza; gitxiago, oraindino, gorrotoa maitasunaren ondo-ondoan dagoela dakigunean. Entzun daigun Jesusen ebanjelioko berbak, harrerea Aleluia abestuz eginda, zutunik.

"Aleluia".

JAINKO HERRIAREN OTOITZA

†  Jesusen jarraitzaile izatea gatx dala jakinik, alkarregaz eskatu deiogun Jainkoari, adoretu gaizala eta arnastu:

   —Elizearen alde: iragarten dauan berbeari zintzo jarraituz, eliztar guztiak Kristoren jarraitzaile izatera erakarri daizan, eskatu deiogun Jaunari.

   —Edozein autortzatako Kristoren jarraitzaile guztion alde: batera lanegin daigun inguruko beharrizanen alde, behartsuekaz bat egin eban Kris­toren autorle lez, eskatu deiogun Jaunari.

   —Pobre ta baztertuen alde: Kristoren benetako aurpegia iragarri deiguen, eskatu deiogun Jaunari.

   —Egunero kurutze astunaren azpian dagozenen alde: zamea arindu deioenen bat aurkitu ahal izan daien, eskatu deiogun Jaunari.

   —Eukaristian esku hartzen dogunon alde: Jainkoaren ontasuna iragartea dala benetako jakituria argi izan daigun, eskatu deiogun Jaunari.

†  Heldu daitela, Jauna, gure otoitza zure entzumenera, eta bigundu daiala gure bihotza. Jesukristo gure Jaunaren bitartez.

   —Amen.

 

OHARRAK

 

 

URTEAN ZEHARREKO 22. DOMEKEA - C -

SARRERAKO OHARKIZUNA

   Gaurko liturgiaren haritik, senideok, gure bizitzako beste kontraesan bat aztertu ahal izango dogu. Gauza bat da apala izatea, leuna, laguntza emoilea, eta beste gauza bat da harroa izatea, norberetzakoa, ikutu-ezina... Ez dogu hau atsegin, baina holantxe agertzen gara, besteen bildurrez-edo, geure lepotik barre egin ez daien. Ez deusku Jainkoak barrerik egingo; eta haren aurrean ezer ez dira harrokeriak. Behar bada, horrexegaitik egiten jaku gatx beragana apaltasunez ta otoizgiroan hurreratzea. Ea lortzen dogun domeka honetako liturgiaren eskutik.

Sarrera-abestia: "Bihotz batez alkarturik..."

 

DAMU-OTOITZA

†  Gure gizarteak geure burua ataraten irakasten deusku, besteak zapalduta bada ere, edo guzurra erabiliz, azpikeriaz, "doppin"az... Autortu daigun, apaltasunez, gure pekatua, Jainkoaren errukian sartzeko asmotan:

   —Jesus Jauna, pobreen lagun izateko, pobre egiten zarana, erruki, Jauna.
   —Jesus Jauna, apala eta bihozbera zarana, Kristo, erruki.
   —Jesus Jauna, baztertuengana hurreratu ahal izateko, zeure ikasle libreak nahi gaituzuna, erruki, Jauna.

 

Lehenengoa: Eklo 3, 19-21.30-31

   Irakurgai honetan aurkituko doguna ez da, gero, zuhurkeriarako deia, edozelan ere irabazi ahal izateko; zintzotasunezko ta jakituriazko jokabiderako deia baino. Hauxe da Jainkoaren gogoko. Entzun.

 

Erantzun-Salmoa:  (67) "..."

R/. Gora Jainkoa, egin kantu: bihotz hautsialk bizten ditu («Kanta Jaunari, lur guztia»ren doinuaz).

Bigarrena: Hb 12, 18-19.22-24a

   Oraindino badago lehengo aldietako kolore-usainak eta handikeriak amesten dauanik: ez dabe aurkitu oraindino benetako fedea. Hau Jesus onartzea da, hari jarraitzea eta Jainkoa beragan aurkitzea.

Ebanjelioa: Lk 14, 1.7-14

   Jesus egiagaz ta zintzotasunagaz egin behar dogu bat, eta ez azaleko apalkeriagaz. Egin deiogun harrerea Aleluia abestuz, zutunik.

"Aleluia".

JAINKO HERRIAREN OTOITZA

†  On guztien iturri dan Jainkoari zuzendu deioguzan gure eskariak, egizaletsunean ibilten irakatsi deigun eta ondasunak hutsean  alkarbanantzen:

   —Elizea, berak iragarten dauan mezuarekin bat eginda eta egizaletasunean bizi izan daiten, eskatu deiogun Jaunari.

   —Agintea euren esku dabenek ez daien ahaztu guztien onaren ardurea daukena, eta laguntzarik gitxien dabenen oinarrizko eskubideen alde urten daien, eskatu deiogun Jaunari.

   —Herrien garapenetik bazterturik dagozanen alde, eukaristiaren mahaira deituak izan daitezan, eskatu deiogun Jaunari.

   —Hitzaren eta ogiaren mahai inguruan alkartuta gagozenok entzun daigun Kristoren berbea, eta jarraitu deiogun pobreekazko konpromisuan, eskatu deiogun Jaunari.

†  Heldu daitela, Jauna, gure otoitza zure entzumenera, eta bigundu daiala gure bihotza. Jesukristo gure Jaunaren bitartez.

   —Amen.

 

OHARRAK